ڪنهن اداري ۾ جڏهن ڪي ماڻهو پنهنجي انفرادي تجربن ۽ سوچ ۽ صلاحيت کي پاسي تي رکي ، ڪن پُراڻن گڏيل نظرين/لاڙن مطابق فيصلا ڪن ٿا ، ته انهيءَ عمل کي “گروپ ٿنڪـ “ طور سڃاتو وڃي ٿو. هن طرح جي فيصلن ڪرڻ جي عمل ۾ڪافي تقصان رسڻ جا خدشا هوندا آهن، ڇاڪاڻ ته هر دور ۾ لاڳو حالتن مطابق ۽ نئين بدلجندڙ سوچ کي سامهون رکي فيصلو ڪجي ته بهتر هوندو آهي. ڪنهن به فيصلي ۾ جيستائين هر ماڻهو پنهنجو الڳ الڳ اظهار (جنهن ۾ شڪ ۽ اختلاف راءِ شامل هجن ٿا) نه ٿو ظاهر ڪري تيستائين ٿيل فيصلي جا نتيجا خاطر خواه نه ٿا ٿي سگهن .1972ع ۾ آمريڪا جي سماجي نفسياتدان ’اِرونگ جينس‘ (Irving L . Janis) هن نظريي کي پهريون دفعو دنيا آڏو چڱيءَ ريت سامهون آندو ، بعد ۾ هن خيال کي هڪ مُک عنصر طور پرڏيهي پاليسيءَ جي لاءِ تمام گهڻو اهم قرار ڏنو ويو. انهيءَ جو وڏو سبب رابطائي نظام جي ترقيءَ سبب ويهين صدي عيسويءَ ۾ زندگي جي مختلف شعبن ۾ تيزيءَ سان ايندڙ تبديليون آهي.’ جينس‘ جو خيال آهي ته هڪ اداري يا نظام ۾مختلف ماڻهو مٽيل سوچ سبب ڪو الڳ فيصلو ڪرڻ چاهيندا آهن ، پر مٿانئن روايتي سچ جي حامين جي ناراضگيءَ جو خطرو هجڻ سبب کين نه چاهيندي به روايتي طريقو اختيار ڪرڻو پوندو آهي. ان کان علاوه ڪنهن به نئين ۽ مختلف فيصلي جي امڪاني بُرن نتيجن جي خوف ۽ نتيجي ۾ اداري ۾ فيصلي ڪندڙ جي ساک کي ڌڪ رسڻ جا امڪان هجڻ ڪري ، “ گروپ ٿنڪ“جي نظريي تحت فيصلو ڪرڻ ۾ بهتري سمجهي وڃي ٿي . ’جينس‘ طرفان 1972ع کان 1982ع دوران ”گروپ ٿنڪ“ جي موضوع تي Victims of Groupthinkنالي ڪتاب ۾ ڪيل تحقيق جو مختصر خاڪو “ گروپ ٿنڪ“ جي عمل ۾ اچڻ جا سبب ۽ انهيءَ جي امڪاني نتيجن سبب پيدا ٿيندڙ صورتحال جي بنياد تي ٺاهيو ، جنهن جو مختصر وچور هن ريت آهي:
1.   ڪو به گروپ فيصلي ڪرڻ دوران ڪنهن به ٻيءَ اهم ڌُر جي ناراضگي ۽ تنقيد نه ٿو ڏسڻ چاهي.
2.   گروپ جي اڳواڻ جي روايتي حيثيت ۽ مرتبو برقرار رکڻ ۽ سندس حڪم مڃڻ جي مجبوري.
3.   ڪن معاملن ۾ تڪڙو فيصلو حالتن جي جبر تحت ٿئي ٿو ، جن کي نظرانداز ڪرڻ مشڪل آهي