سامي نسل جي ماڻهن لاءِ ڌڪار ۽ ساڻن متڀيدواريءَ هلت جنهن مطابق سندن سانوري رنگت کي غلاميءَ جي علامت قرار ڏنو ويو، هونئن ته عربن سميت علائقي جون مڙئي قومون انهيءَ هلت جو شڪار ٿيا. پر ويجهي ماضي ۾ انهيءَ ڌڪار ۽ متڀيد جو خاص نشانو يهودي: انهيءَ رويي جي ابتدا وچين دور (Middle Ages) ۾ ملي ٿي، جڏهن مختلف يورپي ملڪن / قومن (جرمني، پولينڊ، روس وغيره ) وقفي وقفي سان يهودين ڏانهن نسلي متڀيد واري هلت رکي. ويهين صديءَ عيسويءَ ۾ ان اصطلاح جو گهڻو ذڪر جرمنيءَ جي آمر ايڊالف هٽلر جي حوالي سان ٿئي ٿو. يهوديت جي ڪٽر مخالف جي حيثيت ۾، هٽلر يهودين تي بيشمار ظلم ڪيا ۽ کين هر طريقي سان تباهه ۽ برباد ڪرڻ جي ڪوشش ڪئي. هٽلر جرمنيءَ اندر يهودين جي ملازمت تي پابندي هنئي ۽ 1935ع ۾ سندن سڀ شهري حق ختم ڪيا. هٽلر جي ئي حڪم تي ٻي مهاڀاري لڙائي هلندي، يهودين کي جرمنيءَ منجهان تڙيو ويو ۽ لکين يهودين کي جيلن ۽ ايذاءَ گهرن ۾ موڪلي قتل ڪيو ويو. هيءُ اصطلاح ٻن يهودي دانشورن ويلهم مار ۽ ارنيسٽ رينان 1870ع ۾ گهڙيو