هيءُ تصور گهڻي وقت کان سياسي نظريي توڙي حڪمت عمليءَ جي حوالي سان استعمال ٿيندو آيو آهي. جڏهن به ٻه يا ٻن کان وڌيڪ قومون پنهنجي ترقيءَ لاءِ سهڪار کي وڌائينديون آهن، ته اُهو اصطلاح استعمال ڪنديون آهن. عام طور تي ”دولت مشترڪه“ جي نالي سان سڏجندڙ رضاڪارانه بنيادن تي قائم ڪيل هيءَ تنظيم برطانيا، آسٽر يليا ۽ نيوزيلينڊ درميان 1931ع ۾ قائم ڪئي ويئي. ان تنظيم جو بنيادي مقصد برطانيا جي اڳوڻين بيٺڪن تي ٻڌل ميمبر ملڪن درميان اقتصادي، تعليمي، سائنسي، دفاعي ۽ قانوني ميدان ۾ سهڪار ڪرڻ، بهتر حڪومتي سرشتي جو قيام، جمهوريت جو قيام، انساني حقن جو احترام، آزاد واپار ۽ تعاون وڌائڻ آهي. هن وقت ان جا هندوستان ۽ پاڪستان سميت 54 مُلڪ ميمبر آهن ۽ اِن جو هيڊ ڪوارٽر لنڊن ۾ آهي. تنظيم جي مک عهديدار کي سيڪريٽري جنرل سڏيو وڃي ٿو. جڏهن ته ان جو سربراهه برطانيا جو بادشاهه يا راڻي هوندي آهي. اڄڪلهه انگلينڊ جي راڻي ايلزبيٿ هن تنظيم جي ٻي سربراهه آهي. ڪامن ويلٿ جي اندر ٻيون ننڍيون ننڍيون تنظيمون ۽ ادارا به آهن. ”دي ڪامنويلٿ“وارو اصطلاح آمريڪا جي ڪن رياستن (ڪينٽڪي مساچوسز پينسلوانيا ۽ ورجينيا) جي سرڪاري نالن ۾ پڻ سندن حوالو ڏيڻ لاءِ ڪتب اچي ٿو. جن ملڪن صلح سانت سان گڏجي رهڻ جي چونڊ ڪئي ، تن جي سٿ کي به ”ڪامن ويلٿ“ نالو ڏنو وڃي ٿو.