سفير ته ڪنهن به رياست مان ٻيءَ رياست ۾ مقرر ٿيل سفارتي نمائندي يا هڪ مُلڪ جي رياستي سربراهه طرفان ٻئي مُلڪ جي هم منصب وٽ موڪليل، پنهنجي مستقل سفارتي نمائندي کي سڏيو وڃي ٿو. البت ’خصوصي‘ (Extraordinary) جي لقب کي اڄڪلهه جي سفارتي سرگرمين ۾ ڪا خاص اهميت ڪانهي، پر پراڻي دور ۾ ڪنهن اهڙي سفير کي سڏيو ويندو هو، جنهن جي ٻئي مقرريءَ واري مُلڪ ۾ مستقل رهائش نه هجي يا ڪنهن عارضي سفارتي مشن جي سربراهي ڪندي ٻئي ملڪ ۾ مليل مخصوص ذميواريءَ جي ادائگيءَ لاءِ اُسهيل هجي. اهڙي سفير کي مستقل مقرر ڪيل سفير جي ڀيٽ ۾ گهٽ اهميت ڏني ويندي هئي، ڇاڪاڻ جو عارضي طور مليل ذميوارين سبب کيس گهربل مڃتا نه ملندي هئي. ساڳي طرح ”ڪُلُ مختيار“ (Plenipotentiary) سفير به پراڻي دور ۾ مقرر ٿيندڙ مُڪمل سفارتڪار کي سڏيو ويندو هو. اڄوڪي دور ۾ اهو اصطلاح مڪمل ذميواريون ۽ اختيار رکندڙ هڪ بااختيار سفير لاءِ ڪتب ايندو آهي. لفظ Ambassador جڏهن به ڪنهن خاص نالي سان گڏ لکڻ ۾ ايندو آهي (مثال طور: جان منٽر) ته ان لاءِ وڏن حرفن جو استعمال عمل ۾ ايندو آهي ۽ اهو AMBASSADOR طور لکيو ويندو آهي