دنيا ۾ هن وقت جنهن قسم جو غير محفوظ ماحول آهي ، ان ۾ ”سيڪيورٽي“ جو سرشتو بنيادي حيثيت حاصل ڪري چڪو آهي. مختلف ملڪن وچ ۾ جاري سرحدي جهڳڙا، معاشي طور تي اڳ کان اڳرو ٿيڻ جي ڪوشش ۽ سماجي لحاظ کان هڪ ٻئي تي غلبو رکڻ واريون ڳالهيون، عالمي سطح تي تمام گهڻو احتياط ڪرڻ جي نشاندهي ڪن ٿيون. پراڻي دور ۾ ”سيڪيورٽي“ صرف دشمن جي حملن کان بچاءَ طور استعمال ڪئي ويندي هئي، جنهن جي نشاندهي ناميارا سماجي سائنسدان ”والٽر“ ۽ ”بالڊون“ به ڪري چڪا آهن.ان حوالي سان پراڻي دور ۾ تمام وڏا قلعا جوڙيا ۽ هٿيار انهيءَ ڪري گڏ ڪيا ويندا هئا، جو تڏهوڪا بادشاهه ”سيڪيورٽي“ جي حوالي سان ڪنهن به طرح جي ڪوتاهي ڪرڻ نه چاهيندا. دنيا ۾ هن وقت به هٿيارن جا انبار ڪٺا ڪرڻ ۽ بين الاقوامي تعلقات ذريعي پنهنجي ملڪ جي حفاظت ڪرڻ هر ملڪ جي ترجيحي پاليسي ۾ شامل آهي، پر آزاد معاشي سرگرمين کي جاري رکڻ لاءِ به رياست جي محفوظ هجڻ جي خاطري گهرجي ٿي. انهيءَ ڪري ” ورلڊ ٽريڊ آرگنائيزيشن“ جهڙا ڪافي ٻيا به ادارا قائم ڪيا ويا آهن، ته جيئن مختلف ملڪن جي پاڻ ۾ ٿيندڙ واپار، محفوظ طريقي سان جاري رهي سگهي. انهيءَ کان سواءِ ماحول ۾ ايندڙ تبديليون ۽ ڪيترين قومن غلط رٿا بندي ۽ پاليسين جي ڪري دنيا ۾ زراعت کي نقصان رسڻ سبب دنيا جي ڪيترن ئي ملڪن ۾ کاڌي پيتي جي شين جي کوٽ جو خدشو سچ ثابت ٿي رهيو آهي. انهيءَ کوٽ کي ختم ڪرڻ لاءِ گڏيل قومن طرفان”فوڊ سيڪيورٽي“ جا ڪيترائي پروگرام سامهون آيا آهن. دنيا جي ناميارن محققن مطابق، جيڪڏهن هن وقت ڪوبه ملڪ موجوده عالمي سرشتي مٿان مڪمل برتري حاصل ڪرڻ جو سوچي ٿو، ته انهيءَ ملڪ کي صرف هٿيارن جي انبارن جي ضرورت ناهي، بلڪه سياسي، سماجي، معاشي ۽ تعليمي لحاظ کان به کيس دنيا کي سيڪيورٽي ڏيڻي پوندي، ته جيئن سندس سيڪيورٽي واري صلاحيت تي اعتماد پيدا ٿي سگهي. ڇاڪاڻ ته جديد دور ۾ نه رڳو تڪرارن، بحرانن ۽ لڙائين کان بچڻ جي ضرورت آهي، پر گڏوگڏ اهڙن گهڻ -رُخن بندوبستن جي به ضرورت آهي، جنهن سان ملڪ ۽ انهن جي عوام ۾، محفوظ هجڻ جو احساس پيدا ٿئي ۽ سندن سوچ ، ترجيحن، ملڪيتن، ڪاروبار ۽ چرپر کي آزاديءَ ڀريو ماحول ميسر ٿي سگهي. انهيءَ ماحول جي هوندي ئي ڪابه قوم آرام ۽ سڪون سان مستقبل لاءِ رٿابندي ڪندي ترقيءَ جي طرف اڳڀرائي ڪري سگهي ٿي. اهوئي سبب آهي، جو اڄ ڪلهه جي بين الاقوامي تعلقات ۾ ”سيڪيورٽي“ ۽ ترقيءَ جو عمل هڪٻئي لاءِ لازم ملزوم بڻجي چڪا آهن