هن لفظ جو سڀ کان پهريائين استعمال آمريڪي سياسي دانشور ’مائيڪل هيرنگٽن‘ ڪيو. هن تحريڪ آمريڪا ۾ فڪري ڌارائن کي نئون رخ ڏنو ۽ سياست ۾ ايندڙ ظاهري تبديلين ۽ نون لاڙن جو بنياد رکيو. ان گروهه جي رڪنن جي اڪثريت يهودي هئي ۽ ان حلقي سان تعلق رکندڙ سڀ کان وڌيڪ منظم گروهه نيويارڪ ۾ هو. ان تحريڪ جا چار بنيادي مقصد هئا.1. مغربي قدرن جي پٺڀرائي ۽ ڪميونزم جي مخالفت 2. 1960ع جي ڏهاڪي ۾ انهيءَ نظريي جي وڪيلن مُختلف آمريڪي حڪومتن، خاص طور وفاقي حڪومت جي ڪردار، صلاحيت ۽ روين تي شڪ ظاهر ڪيو 3. ان حلقي جي سوچ ڏاڍي روايتي هئي، جنهن ڪري سندس ميمبر مذهبي ۽ اخلاقي لاڙي کي اهميت ڏيندا هئا. 4. ان حلقي عمل کان ماورا نظرين جي مخالفت ڪئي ۽ وڏي پئماني تي برابريءَ ۽هڪجهڙائيءَ (Equality) تي زور ڏنو. هيءُ اصطلاح 1970ع جي ڏهاڪي ۾ آمريڪي پرڏيهي پاليسيءَ ۾ به استعمال ٿيو، جنهن جو مقصد معاشي، سياسي ۽ فوجي سگهه جي استعمال سان، ٻين مُلڪن ۾ آزاد خيالي، جمهوريت ، رواداري ۽ انساني حقن جي حاصلات کي ممڪن بڻائڻ هُئو .