عالمي واپار ۾ اختيار ڪيل سرشتو جيڪو ڪن خاص صورتن ۽ ترجيحن سبب ڪنهن خطي يا ملڪن کي رعايتون ڏيئي ساڻن واپاري ناتا مضبوط ڪرڻ تي زور ڏئي ٿو . هن سرشتي کي سمجهڻ لاءِ ڪجهه تفصيل هن ريت آهن :
(1) هي هڪ اهڙو بندوبست آهي، جيڪو ’گڏيل قومن جي واپار ۽ ترقيءَ جي ڪنوينشن‘ (UNCTAD) جي سهڪار سان متعارف ڪرايو ويو هو. معاهدي موجب هڪ محصوليائي سرشتو اُتر (North) جي رياستن کي ڏنو ويندو آهي، ته جيئن اهي ترقي يافته ملڪن مان تيار ٿيل ۽ اڌ تيار ڪيل شيون درآمد ڪري سگهن. هي نظام ترقي يافته ملڪن ۾ برآمدي ڪمائيءَ ۽ معاشي واڌاري ۽ صنعتي ترقيءَ لاءِ تيار ڪيو ويو هو.
(2) هي نظام هڪ اهڙو ڍانچو آهي، جنهن وسيلي ترقي يافته ملڪن کي هڪ محصولياتي سرشتو ڏنو وڃي ٿو، ته جيئن اهي گهٽ ترقي يافته ملڪن مان درآمد ڪيل سامان جي وڪري لاءِ کين محصولن ۾ رعايتون ۽ ترجيحون ڏيئي سگهن. هي نظام صنعتي ڪاروباري قومن جي مدد سان اسرندڙ ملڪن کي بين الاقوامي واپار واري نظآم ۾ آڻڻ جي هڪ سهڪاري ڪوشش آهي، آمريڪا ۾ هي نظام اهڙن گهٽ اسريل ملڪن کي فائدو ڏئي ٿو. انهيءَ ڏس ۾ آمريڪا هر سال اسريل ملڪن جي پيداوار ۽ سندن وکرن جي معيار ۽ ساڻن واپار لاءِ ڪنهن به ملڪ جي اهليت جي حوالي سان مسلسل جائزو وٺندو رهندو آهي، GSP جي جوڙيل قانون هيٺ آمريڪا انهيءَ ڳالهه کي نظر ۾ رکندو آهي ته آمريڪي قانون موجب فائدو حاصل ڪندڙ ملڪ جي سامان جي رسائي مارڪيٽ تائين پهچي ۽ ان ملڪ جا قانون بين الاقوامي سطح تي واپار جي جوڙيل قاعدن (مثال طور: وکر جي تخيلقي حق جي تحفظ (IPRP)، سيڙپ، درآمدي سرگرمين ۽ پورهيتن جي حقن جي حفاظت) سان برميچي سگهندا هُجن ۽ ڪنهن به غير قانوني يا ڏوهاري واپاري سرگرمين کان ٽارو ڪندا رهن