پهرين مهاڀاري لڙائيءَ (1919-1914ع ) کانپوءِ، اتحادين طرفان جرمنيءَ تي وڌل ڏنڊن واري مرحلي منجهه آمريڪا جي ”يونگ رٿا“ تحت جوڙيل معاشي پاليسين جي نتيجي ۾، هيءَ بئنڪ 17 مئي 1930ع تي قائم ٿي. ان بئنڪ طرفان ميمبر ملڪن جي سِڪن (Currencies) جي قدر ۾ ايندڙ اوچتي لاهي چاڙهي (Fluctuations) تي ضابطو آندو ويندو آهي. ان کان سواءِ ميمبر ملڪن جي مرڪزي بئنڪن ۽ مالياتي ادارن سان سهڪار ڪندي، معاشي توڙي مالياتي مامرن تي ٿيندڙ تحقيق جي ڏس ۾ سهڪار جي آڇ ۽ عالمي بئنڪ يا ڏيهان ڏيهي ناڻي واري فنڊ (IMF) سان ٿيندڙ معاهدن جي حوالي سان فني سهائتا پڻ فراهم ڪئي ويندي آهي. بئنڪ قائم ٿيڻ کان پوءِ يورپ ۾ معاشي بحرانن تي قابو پائڻ ۾ مدد ملي ۽ ”مارشل رٿا“ هيٺ اِن بئنڪ گهڻو ڪجهه ڪيو. موجوده د‍ؤر ۾ هيءَ بئنڪ ميمبر ملڪن (جهڙوڪ آمريڪا، جاپان، ڪئنيڊا، آسٽريليا، ڏکڻ آفريقا ۽ مختلف يورپي ملڪن) جي مرڪزي بئنڪن ۽ مالياتي اختيارين سان لاڳيتي لهه- وچڙ ذريعي مالياتي معاملن تي رٿابندي ڪري ٿي. بئنڪ جو هيڊ ڪوارٽر سئٽزرلينڊ جي شهر باسل (Basel) ۾ آهي. جڏهن ته علائقائي آفيسون هانگ ڪانگ ۽ مئڪسيڪو سٽي ۾ آهن، هي بئنڪ دُنيا جو سڀ کان پراڻو ڏيهان ڏيهه مالياتي ادارو آهي. هيءَ بئنڪ ڪنهن به فرد يا خانگي ڪاروباري اداري سان ڪاروهنوار نه رکندي آهي