دُنيا جي مزدورن جي معاملن ۽ پورهيي جي معيار جانچڻ لاءِ هي تنظيم”قومن جي مجلس“جي آرٽيڪل (a) 23 تحت 1919ع ۾ قائم ڪئي وئي. هن اداري جو مقصد بين الاقوامي ڪنووينشن منعقد ڪرائڻ، مزدوريءَ بابت مختلف تجويزون ڏيئي پورهيتن جي حالت بهتر بنائڻ، پورهيت ۽ مالڪ وچ ۾ لاڳاپن کي بهتر ڪرڻ ۽ پورهيتن کي قانوني تحفظ فراهم ڪرڻ آهي. هن اداري ۾ حڪومتن، ملازمن ۽ ملازم رکندڙ ادارن جا نمائيندا شرڪت ڪري سگهن ٿا. 1944ع ۾ ”فلاڊيلفيا چارٽر“ تحت هن اداري مزدوريءَ بابت بازاري جنس واري تصور کي رد ڪري ڇڏيو ۽ مزدورن کي پنهنجي زندگي، آزادي، عزت ۽ سلامتيءَ سان گذارڻ واري حق جي تصديق ڪئي. اقوام متحده ٺهڻ کان پوءِ هي ادارو اُن جي ماتحت ڪم ڪري رهيو آهي. هي ادارو بنيادي طور 4 نقطن تي ڪم ڪري ٿو :
1. جماعت سازي ۽ سوداڪاريءَ جو حق
2. جبري پورهيي جو خاتمو
3. ٻاراڻي پورهيي جو خاتمو.
4. ملازمت ۽ پورهيي ۾ متڀيد جو خاتمو.
اداري جو مرڪز سئٽزرلئنڊ جي شهر جنيوا ۾ قائم ڪيل آهي. سندس انتظامي ڍانچو ٽن شعبن ”بين الاقوامي ليبر ڪانفرنس“ ، ”گورننگ باڊي“ ۽ ”بين الاقوامي ليبر آفيس“ تي ٻڌل آهي، اداري جو سربراهه ڊائريڪٽر جنرل هوندو آهي، جنهن کي گورننگ باڊي مقرر ڪندي آهي