جڳ مشهور ’بريٽن ووڊس‘ جي اقتصادي نظام تحت هي ادارو جولاءِ 1944ع ۾ آمريڪا جي ’سانفرانسسڪو‘ شهر ۾ قائم ڪيو، جنهن ۾ 44 ملڪن شرڪت ڪئي. بعد ۾ اهو اقتصادي نظام گڏيل قومن جي وضع ڪيل ساڳي طرح جي نظام جو حصو بڻجي ويو. هن فنڊ کي قائم ڪرڻ پُٺيان بنيادي نظريو هو، ته جيستائين دنيا کي اقتصادي مسئلا درپِيش آهن ان وقت تائين امن قائم نه ٿو ٿي سگهي. تنهنڪري هڪ اهڙو بين الاقوامي ادارو قائم ڪرڻ جي ضرورت آهي، جيڪو اُسرندڙ مُلڪن کي پاڻڀرو ٿيڻ جا موقعا ڏيئي سگهي. اهو ئي سبب آهي جو هن اداري جو مقصد ضرورتمند ملڪن کي مختلف فنڊ جاري ڪري، انهن جي اقتصادي حالت بهتر بنائڻ کين گهربل فني سهولتون فراهمن ۽ سندن قرضن جي ادائگي ممڪن بڻائڻ آهي. ان کان علاوه دُنيا ۾ مالياتي ۽ ڏيتي ليتيءَ جي نظام کي بهتر بنائڻ، بين الاقوامي واپار کي وسعت ڏيئي متوازن بنائڻ ۽ مُختلف قسمن جي ادائگيءَ وارن سرشتن کي معياري بنائڻ به اداري جي مُک ڪمن ۾ شامل آهي. ساڳئي وقت I.M.F دُنيا جي مُختلف سِڪن کي استحڪام فراهم ڪرڻ ۾ به مدد ڏئي ٿو. پر جيئن ته I.M.F جي سڄي ڏيتي ليتي آمريڪي ڊالر/ سون واري اصول (جنهن مطابق ان دور ۾ سون جي آئونس جي قيمت 35 ڊالر مقرر ڪئي ويئي هئي) تي بيٺل آهي، تنهنڪري دُنيا جي مڙني سڪن جي پوزيشن ڊالر جي قدر تي پرکي ويندي آهي. هونئن I.M.F قرض فراهم ڪري پنهنجا شرط مڃائڻ ۽ خاص طور اُسرندڙ مُلڪن جي معيشت تي اثرانداز ٿيڻ واري حوالي سان به مشهور آهي. هن سرشتي هيٺ اهو ادارو گهُرجائو مُلڪن کي قرض ڏيئي، کانئن ملڪي مالياتي سرشتي ۾ وياج جي شرح مقرر ڪرائڻ، محصول وڌائڻ ۽ عوامي ڀلائيءَ تي ٿيندڙ خرچن ۾ گهٽتائي آڻڻ وغيره وارا شرط مڃائي پنهنجي ڏنل رقم کي محفوظ ڪرڻ سان گڏ، انهن مُلڪن جي سياسي ۽ معاشي حڪمت عملين تي اثرانداز ٿيندو آهي. 1982ع ۾ ميڪسيڪو جو مثال ان ڏس ۾ وزندار دليل طور پيش ڪيو ويندو آهي، جنهن ۾ 4 ارب ڊالر قرض ڏيئي، I.M.F ميڪسيڪو جي سموري معاشيات تي ڪنٽرول ڪري ورتو. هن تنظيم جو مرڪز واشنگٽن ڊي سي ۾ آهي