هي تنظيمون غير منافعي بخش گهڻ قومي تنظيمون آهن، ان ڪري گهڻ قومي ڪارپوريشنون (MNCs) انهن کان مختلف آهن. ڇاڪاڻ ته اهي گهڻي قدر منافعي بخش ۽ پنهنجي ادارتي ترقيءَ تي ڌيان ڏين ٿيون. هي بين الاقوامي تنظيمون تجارتي، اقتصادي، ماحولياتي، فن ۽ حرفت، سائنس، ٽيڪنالاجي ۽ تعليم وغيره جي شعبن ۾ ڪم ڪن ٿيون. جيتوڻيڪ اهي تنظيمون مُختلف ملڪ ئي جوڙين ٿا، پر انهن ملڪن جا نمائندا غير حڪومتي آهن. جيتوڻيڪ ڪجهه حڪومتي نمائندن کي به انهن تنظيمن ۾ ڪم ڪرڻ جي اجازت ڏني وڃي ٿي، پر پوءِ به اڪثريت غير حڪومتي نمائندن جي هوندي آهي. هنن تنظيمن وٽ پنهنجو ڌار سيڪريٽريٽ هوندو آهي. جنهن ۾ حڪومتن کان ٻاهر جا بين الاقوامي نمائندا ڀرتي ڪيا وڃن ٿا. هن قسم جي تنظيمن جي نمائندگي ”گرين پيس“ ۽ ”ايمنيسٽي انٽرنيشنل“ جهڙيون تنظيمون ڪن ٿيون. هن قسم جي تنظيمن جي شروعات 1839ع کان ٿي ، پر پهرين باقاعده تنظيم ”روٽري انٽرنيشنل“ جي نالي سان قائم ٿي هئي. 1914ع تائين اهڙين تنظيمن جو انگ هڪ هزار کان مٿي ٿي ويو. غلاميءَ جي خاتمي ۽ عورتن جي حقن لاءِ جاکوڙ جي حوالي سان، ويهين صديءَ ۾ هنن تنظيمن جو تعداد تمام گهڻو وڌيو آهي. هنن تنظيمن جا خيراتي، خدمتي، سهڪاري ۽ اختياري وغيره سميت ٻيا ڪيترائي قسم آهن