معاشيات جو عنصر بين الاقوامي سياست ۾ تمام گهڻي اهميت رکي ٿو. بين الاقوامي تعلقات جي علم ۾ ڪنهن به ملڪ جي پرڏيهي پاليسي ۽ ٻين ملڪن سان تعلقات جو جڏهن به تجزيو ڪيو ويندو آهي، ته ان ۾ سياسيات ۽ معاشيات جي پهلوئن کي سڀ کان پهريان جاچيو ويندو آهي. معاشي سرگرميون جڏهن بين الاقوامي سطح تي شروع ڪيون وينديون آهن، ته ان ۾ سياست جو عمل دخل لازمي ۽ اڻ ٽر هوندو آهي. ٻن ملڪن طرفان هڪٻئي سان وهنوار ۽ واپار تڏهن ئي ممڪن ٿي سگهندو آهي، جڏهن ٻنهي ملڪن جي سياسي قيادت ان سلسلي ۾ ڳڻ ڳوت کان پوءِ ڪي واپاري يا ڪاروباري معاهدا ڪندي آهي ، اهو ئي سبب آهي جو بين الاقوامي لاڳاپن ۾ معاشيات ۽ سياسيات کي هڪٻئي لاءِ لازم ملزوم سمجهيو ويندو آهي. عالمي سياسيات ۾ بين الاقوامي سياسي معيشيت واري پهلوءَ کي اهميت ڏيڻ جو اصل مقصد جنگين وڙهڻ واري نفسيات تي بيٺل سياست کي ختم ڪري، پيداواري صلاحيتن کي وڌائڻ ۽ تعميري جذبو پيدا ڪندڙ معاشي سرگرمين کي عالمي سياسي سرشتي ۾ اهم بنائڻ آهي. گڏيل قومن جي سهڪار سان قائم ٿيل عالمي واپاري تنظيم (I.T.O) يا ان قسم جي ٻين ادارن جي قيام کي ملندڙ ترجيح جو اصل سبب دُنيا ۾ هڪ اهڙي ماحول جو قيام آهي، جيڪو واپار جا معاملا به سياسي قيادت جي تدبر ذريعي حل ڪري سگهي. ”انٽرنيشنل پوليٽيڪل اڪنامي“ جي دائري ۾ ڪم ڪندڙ ادارن ۽ سياسي اڳواڻن ”ڀونءِ واد“ (Globalization) جي اصطلاح کي متعارف ڪرايو. ان اصطلاح ۾ ڇهه اهڙا نُڪتا ۽ پهلو ملن ٿا، جيڪي ”انٽرنيشنل پوليٽيڪل اڪنامي“ جا چند بنيادي حصا آهن. جن جي ترتيب هن طرح آهي: پئسو، ڄاڻ، پيداوار، معيشت، سفارتڪاري، ثقافت ۽ جاگرافي. اهي ڇهه ئي عنصر سڀ کان پهريان 1994ع ۾ ”رِويو آف انٽرنيشنل پوليٽڪل اڪنامي“ نالي رسالي ۾ ڏنا ويا جنهن کان اهي ”ڀونءِ واد“ جي بنيادي تصور ۾شامل ڪيا ويا. ڪيترن ماهرن ۽ عالمن پاران ”انٽرنيشنل پوليٽيڪل اڪنامي“ واري تصور جي ڪري، مُختلف ملڪن ۾ لڙائين جا خدشا به ظاهر ڪيا ويا آهن. ڪن دانشور حلقن طرفان اهو خيال ظاهر ڪيو ويو آهي، ته دُنيا ۾ پهريائين هٿيارن جي ذريعي طاقت جو استعمال ٿيندو هو، هاڻي ”گلوبلائيزيشن“ جي ذريعي معاشي جنگي ميدان سجايا ۽ سينگاريا ويندا ڇاڪاڻ ته دُنيا جو هر ملڪ پنهنجي معاشي حيثيت کي وڌ کان وڌ سگهارو ڪرڻ لاءِ وسيلن کي حاصل ڪرڻ جي ڪوشش ڪندو، جنهن ڪري عالمي برادري ۾ ڇڪتاڻ واري صورتحال يقيني ٿي پوندي. ان تصور جي عملي صورت آمريڪا طرفان وچ اوڀر ۽ مرڪزي ايشيا جي علائقن ۾ وڌندڙ فوجي مُداخلت ۽ واپاري سرگرمين منجهان اسان جي آڏو ڏينهون ڏينهن چٽي ٿي رهي آهي