عام ِراءِ جي ڇيدڪاريءَ ۾ استعمال ٿيندڙ هيءُ اصطلاح، عام طور تي پاليسيءَ جي جوڙجڪ ۾ رياست اندر علمي، ڳردار ۽ معلومات ڀريو رويو رکندڙ حلقي جي اهميت جي نشاندهي ڪري ٿو. هن حلقي ۾ سماج جو مٿيون حصو، جيڪو مملڪتي ڪاروبار هلائي ٿو، يا هيٺيون حصو (عوام) جنهن جو موقف ۽ رويو وقت بوقت تبديل ٿيندو رهي ٿو، شامل نه آهي. عام طرح سان مغربي ميڊيائي حلقا، اُن سان لاڳاپيل مضمون نويس، ڪالم نگار ۽ عوامي راءِ تي اثر انداز ٿيندڙ مُختلف فرد/ ادارا ”باخبر حلقا“ سڏجن ٿا. اهي حلقا گهرو توڙي پرڏيهي معاملن تي ٽيڪاٽپڻي ڪندي، عوامي راءِ جوڙڻ ۽ عوامي راءِ کي حاڪم طبقن تائين پهچائڻ ۾ اهم ڪردار ادا ڪن ٿا. البت سندن پهچ ۽ تعداد محدود هُجي ٿو. خاص ڪري ڪن مبصرن جي راءِ آهي ته پرڏيهي يا رياستي معاملن ۾ مخصوص مفاد رکندڙ گروهه (Interest Groups) ۽ سياسي جماعتون فيصله سازيءَ ۾ وڏي اهميت رکن ٿا. پر ”باخبر حلقا“ بظاهر ان قسم جي دلچسپي نه رکندي به، فيصله-سازيءَ واري عمل تي شدت سان اثرانداز ٿين ٿا ۽ سياسي قيادت جي فراهميءَ ۾ پڻ اهم ڪردار ادا ڪن ٿا. مغربي مُلڪن يا خاص ڪري آمريڪا ۾ عوام طرفان سياسي معاملن ۽ پاليسي – سازيءَ واري عمل ۾ گهٽيل دلچسپيءَ کي ذهن ۾ رکندي، با خبر حلقا”طاقت جي مرڪزن“ تائين، نه رڳو عوامي خواهشن کي پهچائين ٿا، پر گڏوگڏ سندن راهنمائي ڪندي کين مُختلف مرحلن تي آسانيون به فراهم ڪن ٿا