ڪو ننڍو پادري يا ڪيٿولڪ مسيحي برادريءَ جا فرد، پوپ (ڪيٿولڪ عيسائي فرقي جو سربراهه يا روحاني پيشوا) جي پاران ڪنهن علائقي ۾ وڃي پوپ جو پيغام پهچائين، يا پوپ جي عيوضيءَ / ايلچيءَ طور سڃاتا وڃن، ته انهيءَ عمل کي نيابت (Legation) جي طور تي تسليم ڪيو وڃي ٿو. اڄوڪي دور جي بين الاقوامي تعلقات ۾ ”ليگيشن“ جو مرتبو عام طرح فقط ڪو سفير يا وزير استعمال ڪندو آهي. هي اصطلاح هڪ قسم جي سفارتي تحفظ يا خاطريءَ جي لاءِ پڻ استعمال ڪيو ويو آهي. ’ليگيشن‘ مطابق جيڪڏهن ملڪ A جو سفير ملڪ B ۾ مقرر ٿي ويندو، ته ان کي پنهنجي ملڪ (يعني ملڪ A) جي پرڏيهي معاملن جي کاتي طرفان اختيار هجڻ ضروري آهي، ڇو ته اهڙي اختيار هُئڻ سبب، ملڪ B ان سفير کي باهمي لاڳاپن تحت تحفظ فراهم ڪرڻ لاءِ پابند هُجي ٿو. ان ڪري جو وٽس مقرر ٿيل سفير ملڪ A جي ڏنل اختيار (Legation) تحت مقرر ٿيل هوندو آهي. ان کان علاوه پناهه گيرن يا هجرت ڪندڙن کي به ”ليگيشن“ ڏني وڃي ٿي. ڏکڻ آفريقا ۾ جڏهن زبردست نسلي فساد شروع ٿيا هئا، ته برطانيه طرفان ڏکڻ آفريقا جي ڪاري رنگ جي شهرين کي، انهيءَ اختيار تحت تحفظ ڏنو هو. اهڙا حبشي شهري ڏکڻ آفريقا ۾ رهندي به ”برطانوي ليگيشن هيٺ رهندڙ شهري“ طور سڃاتا ويندا هئا