هيءَ هڪ بين السرڪاري تنظيم آهي، جنهن جو بُنياد 1961ع ۾ يوگوسلاويه جي راڄڌاني ’بلغردا‘ ۾ وڌو ويو. جنهن ۾ واضح ڪيو ويو ته تنظيم ميمبر مُلڪ جي حفاظت کانسواءِ سامراجيت، بيٺڪيت، نوآبادڪاري سرشتي، نسل پرستي ۽ ڌارئي ملڪ جي والار کي رد ڪندي، مظلوم ۽ محڪوم قومن لاءِ هڪ ڌار پلئٽفارم جوڙيندي. هن تحريڪ جو بنياد بريوني شهر (يوگوسلاويا)۾ ٿيندڙ ٻن ڏينهن واري ڪانفرنس ۾ پيو، جنهن ۾ مصر جي صدر ’جمال ناصر‘، يوگوسلاويا جي صدر ’جوزف ٽيٽو‘ ۽ انڊيا جي وزيراعظم ’جواهر لال نهروءَ‘ شرڪت ڪئي، جيڪي ئي بعد ۾ تنظيم جا بُنيادي اڳواڻ ٿيا. هن تنظيم جو مقصد هوانا پڌرنامي (1979ع) ذريعي طئه ڪيو ويو، جنهن مطابق، تنظيم جو اهم مقصد ٽين دنيا جي ملڪن درميان اقتصادي ۽ سماجي تعاون وڌائڻ ۽ آمريڪا ۽ سوويت يونين درميان هلندڙ سرد جنگ کان پاسو ڪرڻ هو. 2010ع تائين ان تنظيم جا 118 ميمبر ۽ 18 مبصر هئا.