جنگي هنر ۾ ڪتب ايندڙ اصطلاح ، جيڪو ڪنهن به ملڪ طرفان دشمن جو نشانو بڻجڻ کان بچڻ لاءِ ملڪي سرحدن يا ان کان ٻاهريان مهاڏو اٽڪائڻ جي تياريءَ جي سلسلي کي چٽو ڪندو آهي . هن تصور هيٺ ڪو به ملڪ پنهنجي اڳواٽ بچاءَ جو بندوبست ڪندي ، دشمن جي امڪاني حملي جو ٽوڙ ڳولي ڇڏيندو آهي . هي اصطلاح ’ٿڌي لڙائيءَ‘ واري دور ۾ سوويت-آمريڪي ٽڪراءَ جي حوالي سان مشهور ٿيو . جنهن مطابق ٻنهي عالي طاقتن پاڻ کي ٻيءَ ڌر طرفان ٿيندڙ امڪاني اڳرائيءَ کان محفوظ رکڻ لاءِ ، نه رڳو ملڪي سرحدن تي زبردست انتظام ڪيا ، پر اتحادي ملڪن ۾ فوجي اڏا قائم ڪرڻ ۽ فوجون رکڻ ذريعي هڪٻئي لاءِ چتاءَ ڀريو ماحول پيدا ڪري ڇڏيو . ان چال ذريعي ٻنهي طاقتن پنهنجي علائقي ۽ عوام کي سڌو سنئون حملي جو بک بڻجڻ کان بچائي ورتو . ’اڳڀري بچاءَ‘ جي تصور هيٺ آمريڪا طرفان اولهه يورپ ، جاپان ۽ ڏکڻ ڪوريا سميت مختلف اتحادي ملڪن ۾ فوجون رکيون، جڏهن ته ساڳئي حڪمت عمليءَ هيٺ سوويت يونين طرفان اوڀر يورپ ،ڪيوبا ۽ افغانستان ۾ فوجي اڏا کوليا