مخالف ڌُريون جڏهن ڪمپيوٽر ٽئڪنالاجيءَ جي ذريعي ثقافتي ۽ سياسي طور، هڪٻئي جو بين الاقوامي تاثر بڇڙو ڪرڻ جي ڪوشش ڪن ۽ هڪٻئي جي معلومات چورائي مُشڪلاتون پيدا ڪن، ته ان عمل کي Net War جي اصطلاح سان بيان ڪيو ويندو آهي. اڄڪلهه هيءَ ڇڪتاڻ ڏينهون ڏينهن وڌي رهي آهي. مُختلف ملڪن سان لاڳاپيل پيشه ور معلوماتي چور (Hackers) خانگي توڙي سرڪاري سهائتا سان، مخُالف جي معلوماتي خزاني (Data base) ۾ وڃي، نه صرف ان جي ڪٺي ڪيل تفصيلن ۾ گڙٻڙ ڪن ٿا، پر ان جي استعمال کي به ناممڪن بڻائين ٿا. اهڙا چور، مُخالف ڌُر جي رازن، رپورٽن ۽ ٻين تفصيلن کي چورائي، سندس حڪمت عملين کي پڻ بي اثر بڻائين ٿا. موجوده دور ۾ Wikileaks جي حوالي سان آمريڪا ۽ سندس اتحادين جي ڳُجهين سفارتي رپورٽن ۽ مواد کي ”جولين اسانج“ نالي هڪ ڪمپيوٽر ماهر چورائي دُنيا آڏو پڌرو ڪري ڇڏيو آهي، جنهن ڪري آمريڪي ۽ يورپي حُڪومتون تمام گهڻيون پريشان آهن. هن قسم جي ”پُرامن جنگ“ شخصن، ادارن ۽ حڪومتن وچ ۾ ڏينهون ڏينهن زور وٺي رهي آهي.