روسي ٻوليءَ جو لفظ، جنهن جو لُغوي مطلب آهي ”همسفر“. هي نالو سوويت يونين پنهنجي خلائي رٿا جي ٽن مصنوعي سيارن کي ڏنو ، جيڪي وقفن سان خلا ۾ ڇڏيا ويا. ’اسپوتنڪ‘ جو بنيادي مقصد خلا جي جاچ پڙتال لهڻ ۽ اتي رهندڙ جاندارن جي باري ۾ تحقيق ڪرڻ هيو. اسپوتنڪ جي خلا ۾ وڃڻ کان پوءِ آمريڪا ۽ سوويت يونين وچ ۾ خلائي ڊوڙ شروع ٿي وئي. هن نالي سان دُنيا جو پهريون هٿرداو اپگرهه/ سيارو آڪٽوبر 1957ع ۾ سوويت يونين مان پولار ۾ موڪليو ويو. 180 پائونڊ جي وزن وارا - اوتا (سگنل) دراصل پولار ۾ سوويت ٽئڪنالاجيءَ جي برتريءَ جو اُهڃاڻ هُئا. ان کان 6 هفتا پوءِ جڏهن ”اسپوتنڪ-2“ خلا ۾ هڪ ڪُتو ۽ اڌ ٽن جو وزن کڻي روانو ٿيو، ته دنيا محسوس ڪيو ته ڄڻ ’آمريڪي سگهه‘ جي زوال جي ابتدا ٿي چڪي هُجي. ان اڳڀرائيءَ جي جواب ۾ 1958ع ۾ Explorer جي نالي سان آمريڪا طرفان گهٽ وزن وارو اپگرهه پولار ۾ موڪليو ويو، جيڪو ”اسپوتنڪ“ کان وڌيڪ ڪارگر ۽ معلومات فراهم ڪندڙ ثابت ٿيو. پر جيڪا تاريخي حيثيت ”اسپوتنڪ“ کي ملي سا آمريڪا جي سياري Explore کي نه ملي سگهي. سوويت يونين جي هن اڳڀرائيءَ آمريڪا جي ماهرن ۽ حڪومتي اهلڪارن کي پريشان ڪري ڇڏيو ۽ مٿانئن تاثر قائم ڪيو ته آمريڪي ميزائلن (ICBMs) Intercontinental Ballastic Missilesجي برتري ختم ٿي چُڪي آهي. عام راءِ به اهو تاثر ورتو ته سوويت يونين غيرروايتي لڙائيءَ ۾ آمريڪا کان اڳ ڪڍي چُڪو آهي