هيءُ نظريو بين الاقوامي تعلقات جي ماهرن لاءِ تمام گهڻي اهميت رکي ٿو، ڇاڪاڻ ته هن نظريي هيٺ بين الاقوامي سطح تي هر معاشري جي ڪيفيتي صورتحال جي تڪ - تور ڪئي وڃي ٿي. هن نظريي کي عملي طور تي دنيا جي سياسي سرشتي ۾ بهتري آڻڻ جو هڪ اهم ماخذ سمجهيو وڃي ٿو. هيءُ نظريو ڪنهن به معاشري جي اندر سياسي، سماجي، قانوني، معاشي، جاگرافيائي ۽ عسڪري حوالي سان ٿيندڙ سرگرمين جو جائزو وٺندي، اُن ۾ بهتر، دُرست ۽ هاڪاري روين ۽ نقصانڪار يا ناڪاري لاڙن جي ڇنڊڇاڻ ڪندي، هڪ مثالي انساني سماج جي اڏاوت جي سلسلي ۾ رهبري ڪري ٿو. هيءُ نظريو اعليٰ اصولن جي پاسداري ڪندي، اخلاقي قدرن، انصاف جي حاصلات ، سچائيءَ جي سوڀ ۽ انساني معاشري کي روشن ۽ راهنما اصولن تحت منظم ڪرڻ لاءِ استعمال ڪيو وڃي ٿو. هي نظريو سڀ کان اڳ سماجي سائنس جي مُختلف شعبن ۾ متعارف ڪرايو، جنهن کانپوءِ باضابطا طور هن نظريي کي بين الاقوامي تعلقات جي علم جو حصو بنائڻ جي ضرورت محسوس ڪئي وئي. جرمنيءَ جي جڳ مشهور سماجي سائنسدان ”ميڪس ويبر“ نارميٽو ٿيوري کي فقط اخلاقي ضابطن تي زور ڏيندڙ تصوراتي خاڪو نه پر هڪ ”سائنسي نظريو“ سڏيو آهي. سندس چوڻ موجب اُهو نظريو سائنسي جاکوڙ وانگر معلومات کي گڏ ڪرڻ، ان جي ڇنڊ ڇاڻ ڪرڻ، مليل معلومات مطابق معاملي يا مسئلي جي حل بابت رٿابندي ڪرڻ ۽ ان سلسلي ۾ طئه ٿيل حڪمت عمليءَ کي لاڳو ڪرڻ کانپوءِ مليل نتيجن جي روشنيءَ ۾ مُناسب حل تجويز ڪري ٿو. ”سرد جنگ“ واري دور ۾ جنگ ۽ سيڪيورٽي جي معاملن کي ”نارميٽو ٿيوري“ مطابق جاچيو ويندو آهي. بين الاقوامي معاملن ۾ به جنگ کي جائز دليلن ذريعي واجبي سمجهڻ (Just War) کان پوءِ ئي، ڪنهن به مُهذب ملڪ طرفان جنگ ڪرڻ واري اڳڀرائيءَ کي مڃتا ڏني وڃي ٿي. انهيءَ ڪري جو هن نظريي مطابق ڇڪتاڻ هيٺ آيل علائقي ۾ جنگ کي واجبي قرار ڏيڻ کان اڳ، لاڳاپيل ڌُرين ۾ ڇڪتاڻ گهٽائڻ ۽ ختم ڪرڻ جي حتي الامڪان ڪوشش ڪئي وڃي. علمي مُباحثن دوران عمرانيات جي ماهرن (Sociologists) ۽ حقيقت پسندن (Realists) جي وچ ۾ اهو بحث مسلسل رهندو آهي ته طاقت جي زور ۽ لڙائيءَ ذريعي مُلڪن وچ ۾ تڪرار حل ڪرائڻ وارو طريقو بهتر نتيجا ڏيندڙ آهي يا نه ؟ هڪ سوشولاجسٽ هر بحراني صورتحال ۾ انساني اخلاقي قدرن لاءِ احترام کي ترجيح ڏئي ٿو، جڏهن ته هڪ ”ريئلسٽ“ عارضي طور تي ئي سهي جنگ کي ترجيح ڏئي، مستقل طور تي مسئلن کي ختم ڪرڻ جو نظريو رکي ٿو. دُنيا کي طاقت جي مسلسل زور آزمائيءَ جو آکاڙو قرار ڏيندڙن جو خيال آهي ته Normative Theory خيال پسنديءَ تي ٻڌل هڪ ڪتابي ۽ تصوراتي نظريو آهي، جيڪو دُنيا کي درپيش مسئلن جو عملي حل ڏسڻ بجاءِ فقط اخلاقي اصولن جي وڪالت ڪري ٿو. پر هن نظريي جي وڪيلن جو چوڻ آهي ته انساني داخلي احساسن ۽ صدين جي ادراڪ تي بيٺل حقيقتن جي روشنيءَ ۾، جيستائين عالمي سماج لاءِ رهنما اصول طئه نٿا ٿين، تيستائين ان مان بحرانن ۽ تڪرارن جو خاتمو اڻ ٽر آهي، پوءِ ڀلي ته بيشمار جنگيون ڇو نه لڙيون وڃن؟