پهرين عالمي جنگ کان پوءِ آمريڪا، برطانيا،سوويت يونين،جرمني ۽ جاپان ائٽمي هٿيار ٺاهڻ لاءِ تجربا شروع ڪيا. سڀني کان اڳ آمريڪا (1945ع ۾) ائٽمي بم جوڙيو ۽ آگسٽ 1945ع ۾ ان کي جاپان مٿان اڇلايو. اڳتي هلي سوويت يونين(1949ع)، برطانيا (1952ع)، فرانس (1960ع)، چين (1964ع) ڀارت (1974ع )، پاڪستان (1998ع) ائٽمي ڌماڪا ڪيا . جڏهن ته اڳتي هلي اُتر ڪوريا (2006ع ۾) به ائٽمي تجربو ڪيو ، البت جرمني ۽ جاپان اهڙي ڊوڙ کان پري ٿي ويا. ان هوندي به ڪن قومن ڳجهه ڳوهه ۾ ته ڪن چور بازاريءَ ذريعي ائٽمي هٿيار جوڙڻ يا اها ٽيڪناجي حاصل ڪرڻ لاءِ جاکوڙ جاري رکي. ان سلسلي ۾ ’ائٽمي هٿيارن جي ڦهلاءَ کي روڪڻ واري 1968ع ۾ ٿيل معاهدي‘(NPT) جي ڀڃڪڙي ڪندي ائٽمي مواد،سامان،اوزار،بم ۽ معلومات ائٽمي هٿيار نه رکندڙرياستن/ڌرين تائين پهچائڻ جي عمل کي هن اصطلاح سان سڃاتو وڃي ٿو. ائٽمي صلاحيت رکندڙ يا نه رکندڙ قومن جي اڪثريت جو خيال آهي ته نيوڪليائي هٿيارن/ سامان جي ڦهلجڻ سان عالمي امن کي خطرو ۽ بين الاقوامي لاڳاپن ۾ بگاڙ ايندو. ان ڪري دنيا جي اڪثر فورمن تي ائٽمي ڦهلاءَ جي ڪوششن تي ضابطي آڻڻ جي حمايت ٿيندي رهي آهي.