Joint

جوائنٽ

سنڌ، ٻن يا ٻن کان وڌيڪ ھڏن جي ميلاپ جو ھنڌ. ڪيترا سنڌ گهڻا ڦرندڙ گهرندڙ، ڪي کتل ته ڪي رڳو محدود چرپر ڪري سگهن ٿا. کوپريءَ جا سنڌ کتل ۽ تاندوري ٽشوءَ رستي سُڪ ٿين ٿا. ڦرندڙ گهرندڙ سنڌن جا منھن ملائم ڪارٽيليج (cartilage) جي تھه ۾ بند ٿين ٿا ته جيئن انھن جي گهٽ گاٺ ٿي سگهي. سنڌ، ھڪ سگهاري تاندوري ڪيپسول ۾ بند ٿيل ۽ سنوويئل (synovial) تھه ۾ ويڙھيل ٿئي ٿو (ڏسو، synovium) جيڪو ھڪ قسم جو مک پيدا ڪندو رھي ٿو. ھر سنڌ طاقتور ٻنڌين (ligaments) سان گهيريل ٿئي ٿو جيڪي ان جو بچاءُ ڪن ٿا ۽ انتھا جي چرپر ڪرڻ کان بچائين ٿا. سنڌن جي چرپر جن مشڪن رستي ضابطي ۾ رھي ٿي اھي سنڌ جي ٻنھي پاسن کان ھڏي جي جوٽن (tendons) سان ڳنڍيل ٿين ٿا. چرپر ڪندڙن گهڻن سنڌن کي ويجهڙ ۾ گهٽ ۾گهٽ ھڪڙو برسَا (bursa) ٿئي ٿو جيڪو دٻاءَ واري ھنڌ لاءِ گديءَ جو ڪم ڪري ٿو. چرندڙ سنڌ ڪيترن قسمن جا ٿين ٿا. انھن ۾ ان جي سي (hinge) سنڌ سادي ۾ سادا ٿين ٿا، وري ۽ سڌي ٿيڻ جو ڪم ڪرائين ٿا جھڙوڪ: آڱرين وارا. گوڏي ۽ ڪرائيءَ وارا، ان جي سي سنڌن جو اعليٰ نمونو ٿين ٿا جيڪي ڪجهه گول ڦرڻ جو به ڪم ڪن ٿا. ڦرڻا (pivot) سنڌ جھڙوڪ: پھرين ۽ ٻي ريڙه (ڏسو، vertebra) وارا سنڌ رڳو گول ڦرڻ جو ڪم ڪن ٿا. اِلپسوائيڊل (ellipsoidal) سنڌ جھڙوڪ: مُري وارا ھر قسم جي چرپر ڪرائين ٿا سواءِ ڦڙڻن جي. گولي پياليءَ وارا (ball and socket) سنڌ جن ۾ دُڏ ۽ ڪلهي جا سنڌ به شامل ٿين ٿا، وسيع حد ۾ چرپر ڪرائين ٿا (پوئتي يا اڳتي، پاسي ڀر ۽ گول). عام ڌڪن ۽ ضربن ۾ موچ (sprain)، ڪارٽيج کي ڇيھو رسڻ، ٻنڌيون ٽٽي پوڻ ۽ سنڌن جا ڪيپسول ڦاٽي پوڻ شامل ٿين ٿا. سنڌ نڪري پوڻ جو عام طور تي سبب ضرب ته ورلي موروثي به ٿئي ٿي. گهٽ شديد ضرب سبب سبلُوڪسيشن (subluxation) ٿي پوي ٿي. ورلي، ھڏن جا ڇيڙا ٽٽي ڀڄي پون ٿا جنھنڪري سائِنووائيٽس (sinovitis) سبب سنڌھير/ سنڌ ۾ رت وھڻ (haemarthrosis) يا اِفيوزن (effusion) ٿي سگهي ٿي. عام طور تي سنڌ آرٿرائيٽس (arthritis) سبب متاثر ٿي پون ٿا. مقامي سوزش يا سيٽ (strain) جي نتيجي ۾ برسائِيٽس (bursitis) پيدا ٿي سگهي ٿي.