مدافعتي سگهه جي کوٽ وارو مرض، طبي سائنس 1981ع ۾ هن بيماريءَ جي پهريون دفعو سڃاڻپ آمريڪي هم جنس پرست مردن ۾ ڪئي. ان کانپوءِ ٻن سالن جي عرصي ۾ آمريڪا ۽ فرانس ايڊز جي جيوڙي HIV (Human Immunodeficiency Virus) کي ڳولي لڌو. عام طور تي دُنيا ۾ هي مرض يا جيوڙو HIV-I ۽ اولهه آفريقا ۾ اهو HIV-2 طور سڃاتو وڃي ٿو. هن بيماريءَ جي لڳڻ جا ڪيترائي طريقا آهن. مثال طور: ’ايڊز‘ جا جيوڙا کڻي هلندڙ مرد يا عورت سان جنسي تعلق پيدا ڪرڻ يا منجهائن ڪنهن هڪ جو رت استعمال ڪرڻ ، مريِض جون واپرايل سُيون ، ڏاڙهي ڪوڙڻ جي بليڊن سميت ٻين جي استعمال ۾ آيل شيون ڪتب آڻڻ وغيرهه . ايڊز جي جيوڙن کان متاثر ٿيل عورت جو ٻار به هن بيماريءَ کان بچي نه ٿو سگهي. عالمي صحت جي اداري (WHO) موجب هن وقت دُنيا ۾ 2 ڪروڙن کان به وڌيڪ ماڻهو ايڊز جي بيماريءَ ۾ مبتلا آهن. هن تقريبن لاعلاج مرض کي روڪڻ لاءِ بين الاقوامي سطح تي ڪافي ڪوششون ويون آهن. 1986ع ۾ عالمي صحت جي اداري ”Global Program on AIDS“ شروع ڪيو، جنهن جا 3 خاص مقصد هئا: هڪ: HIV کي وڌيڪ پکڙجڻ کان روڪڻ، ٻيون: مريِض کي محفوظ ماحول ڏيڻ ۽ معاشري جي طرفان ناڪاري روين کان مريض کي بچائڻ ۽ ٽيون: بيماريءَ جي علاج ۽ احتياط لاءِ تحقيق ڪرڻ. اڄوڪي دور ۾ بين الاقوامي تعلقات جي مدد سان هن بيماريءَ کي روڪڻ جون وڌ کان وڌ ڪوششون ٿي رهيون آهن