اهڙي سرگرمي يا معاملو جيڪو ڪنهن به هڪ ملڪ جون سرحدون پار ڪري گهڻين قومن/ رياستن تائين ڦهلجي وڃي ۽ جنهن جا اثرهڪ ئي وقت ڪنهن مخصوص ملڪ تي نه پرگهڻن مُلڪن تي پوندا هجن. مثال طور ماحولياتي تپش هڪ ئي وقت ڪنهن هڪ نه پرهڪ کان وڌيڪ رياستن جو مسئلو هوندي آهي ۽ ان کي مٿَ- قومي سطح تي ئي منهن ڏيئي سگهجي ٿو. ان سلسلي ۾ يورپي يونين جهڙيون مٿَ - قومي تنظيمون مثال خاطر پيش ڪري سگهجن ٿيون. اهڙين تنظيمن جي ڪيل فيصلن ۽ جوڙيل پاليسين جا اثرسموري خطي ، سڀني ميمبر ملڪن ۽ ساڻن واسطيدار يا وهنوار ۾ ايندڙ ملڪن ۽ ٻين تنظيمن جي مفادن تي پون ٿا. ان ڪري ان ۾ گهڻن ملڪن جا ماهر۽ پاليسيون جوڙيندڙ حصو وٺن ٿا.هن قسم جي سرگرمي بين الاقوامي(International) گهڻ- قومي (Multinational) ۽ وڏ- قومي (Supra-national) سطح تي ٿيندڙ سرگرمين کان بالڪل مختلف هوندي آهي، ڇاڪاڻ جو اهڙي سرشتي ۾ ڪيل فيصلن ۾ رڳو لاڳاپيل حڪومتون نه پر عوام ، گهڻ- قومي منڊلين ، سول سوسائٽيءَ سميت سماج جي سڀني پرتن کي شريڪ ڪيو ويندو آهي ۽ هڪ ملڪ ۾ ڪيل تجربا ٻين ملڪن لاءِ سبق ۽ سکيا جو سبب بڻبا آهن