يورو ڊالر مختلف بئنڪن يا ٻين مالياتي ادارن ۾ رکيل آمريڪي ڊالرن جوا هو انگ آهي، جيڪي آمريڪا جي سرحدن کان ٻاهر رکيل آهن، ٻين لفظن ۾ يورو ڊالر آمريڪي ڊالرن جهڙو آهي پر ملڪ کان ٻاهر رکيل هئڻ ڪري ساڳيو ڊالر ملڪ کان ٻاهر پيل ڊالر سڏبو آهي، ساڳيءَ طرح جيڪڏهن ڊالر کي ايشيا جي مالياتي ادارن ۾ جمع ڪري رکيو ويندو ته ان کي ”ايشيائي ڊالر“ سڏبو . دراصل هن معاملي ۾ صورتحال انهيءَ ڳالهه تي به دارومدار رکي ٿي ته جمع ڪيل پئسا ڪٿي جمع ٿيل آهن ؟ ”يورو“ جو استعمال ڊالرن سان لاڳاپيل هجڻ ڪري ”يورو“ جي شڪل ۾ به ناڻو ٻاهرين ملڪن ۾ جمع ڪيو ويندو آهي ، پر ڊالر کي بنيادي حيثيت هجڻ ڪري يورو جي شڪل ۾ جمع ڪيل ناڻو به ”يورو ڊالرس“ سڏائيندو آهي ، تنهنڪري دراصل هڪ ملڪ طرفان ٻئي ملڪ ۾ جمع ڪري رکيل سندس رقم کي هن اصطلاح سان واضح ڪيو ويندو آهي. ان کان علاوه آزاد پڙيءَ ۾ خريدار ۽ وڪڻندڙ جڏهن ملڪ کان ٻاهر ناڻي جي مٽا سٽا ڪندا آهن ته سندن ان عمل کي به هن اصطلاح ذريعي بيان ڪبو آهي.