رسالت، سفارت، ميڙ، سپردگي

وفد- جماعت مندوبين- سونپيل

ڪنهن به ڪانفرنس، ميڙ يا نمائنده اجلاس ۾ لاڳاپيل مختلف ڌرين جي موقف کي بيان ڪرڻ لاءِ، هر ڌر طرفان واضح هدايتون ۽ حڪم ڏيئي ماهرن ۽ عملدارن تي ٻڌل سڄاڻ فردن جو هڪ جٿو نمائندگيءَ لاءِ موڪليو ويندو آهي، جنهن کي وفد/نمائيندا سڏيو ويندو آهي. اهو وفد پيرائتي انداز ۾ ثبوتن سان پنهنجو نقطئه نظر بيان ڪرڻ سان گڏ پنهنجي اختيار ڪيل موقف جي حمايت لاءِ پڻ ماحول سازگار ڪندو آهي. سياست کان سواءِ سائنس، معيشيت، صحت، ثقافت ۽ بيشمار ٻين شعبن ۾ رياست يا قوم جي ترقي، سگهه ۽ منفرد روايتن جو اظهار هن طريقي سان ئي ڪيو ويندو آهي، دنيا ۾ تڪرارن جي حل کان وٺي امن جي بحالي ۽ شعبه جاتي تعاون جو ماحول پيدا ڪرڻ ۾ مدد ملي ٿي. ان کان علاوه سفارتڪاريءَ جي شعبي ۾ به هي اصطلاح اڪثر استعمال ٿيندو رهيو آهي. جنهن مطابق نه رڳو اهم سفارتڪارن جو هڪ گروپ جوڙي کيس خصوصي مقصد سونپيا ويندا آهن، پر خاص اختيار ڏيندي قومي اظهار جو ذريعو بڻايو ويندو آهي، ڪنهن به سفارتڪار کي، جڏهن به ڪنهن خاص مقصد جي تڪميل ڪرڻي هوندي آهي ته کيس اهي غير معمولي اختيار، حق ۽ واسطا به ڏنا ويندا آهن، جن جي استعمال سان گهربل مقصد پورا ٿي سگهن، بين الاقوامي تعلقات ۾ ادارن طرفان فردن کي ۽ فردن طرفان انتظامي ۽ ٻيا معاملا هلائڻ لاءِ لاڳاپيل شعبن کي اختيارن جي منتقليءَ واري عمل کي به هن اصطلاح ذريعي پڌرو ڪري سگهبو آهي