وچ آفريقا ۾ قائم ٿيل ملڪ جو نالو، جنهن کي 1970ع کان”زائر“جي نالي سان سڏيو ويندو آهي. 8 ڪروڙ آبادي تي ٻڌل هيءُ ملڪ پکيڙ جي لحاظ کان سوڊان ۽ الجيريا کانپوءِ آفريقا جو ٽيون وڏو ملڪ آهي ۽ 20 صديءَ ۾ بيلجيم جي بيٺڪ به رهيو آهي. 1960ع ۾ آزادي ماڻڻ کانپوءِ ڪانگو گهرو لڙائيءَ جي ور چڙهي ويو، جنهن جو فائدو وٺندي دنيا جي مها طاقتن ان کي پنهنجي ڌُريائي جنگي حڪمت عمليءَ جو حصو بڻائي اڻ کُٽ جنگين جي حوالي ڪري ڇڏيو. ڪانگو ۾ هڪٻئي جي مخالف سياسي ليڊرن پيٽرس لوممبا، ڪاسا ووبو ۽ سومبو جي وچ ۾ ٿيل گهرو لڙائيءَ غريب عوام کي وڏين مصيبتن ۾ جڪڙي ڇڏيو. بعد ۾ گڏيل قومن جي ڪوششن سان ڪجهه وقت لاءِ ڪانگو ۾ امن قائم ٿيو، پر پوءِ به هيءُ ملڪ مسلسل سياسي ڇڪتاڻ جو شڪار رهيو. ڪانگو جي گاديءَ جو هنڌ ڪِنشاسا آهي. هن مُلڪ عظيم انقلابي اڳواڻ پيرس لوممبا جي ڪري ٽين دُنيا جي ملڪن ۾ وڏي مڃتا ماڻي.