هي اصطلاح مُختلف رياستن جي هڪٻئي سان سياسي ۽ معاشي ڳانڍاپي کي بيان ڪرڻ لاءِ استعمال ڪيو ويندو آهي،جيڪو ٻن قسمن جو هوندو آهي. 1. ڪنفيڊرلزم هڪ سلسلو آهي، جيڪو بين الحڪومتي ميلاپ کي جنم ڏيندي، ’يورپي يونين‘ جهڙن فورمن کي جنم ڏئي ٿو. جنهن ذريعي مُختلف رياستون گڏجي، متفقه پاليسيون جوڙڻ سان گڏ سياسي ۽ معاشي ايڪي طور سرگرميون ڪن ٿيون 2. ڳانڍاپي ذريعي ٿيل حاصلات جي نتيجي ۾، هڪ نرم قسم جي اهڙي رياست جو وجود عمل ۾ اچي ٿو، جنهن جو دنگُ به ”رياستي مرڪزيت“ واري نُڪتي تي وڃي ٿئي ٿو. ۽ ڪنهن به صورت اُهو روايتي ”قومي رياست“کان مٿڀرو نه ٿو هُجي. جديد دور ۾ هڪ رياستي سرشتي جي روپ ۾ ”ڪنفيڊرلزم“ ڪا خاص ڪاميابي ماڻي نه سگهيو آهي، جنهن جو سڀ کان چٽو مثال ان سرشتي جي متحده آمريڪا ۾ ناڪامي آهي. ڪنهن به ”ڳانڍاپي“ سان اڌوري واسطيداريءَ وارو عنصر، جنهن کي ”ڪنفيڊرلزم“ جي بنُيادي ڪمزوري سمجهيو وڃي ٿو، سو درحقيقت رياستي ميلاپ جي حوالي سان هڪ بهتر پهلو ثابت ٿيو آهي.ڇاڪاڻ جو انهيءَ عمل سان ڪا به رياست ”وفاقيت“ جي قتل گاهه تي ٻليدان ڏيڻ کان بچي وڃي ٿي. ’ڪنفيڊرلزم‘ رياستن جي گهرجن کي وسيع سهڪار ذريعي پورو ڪرڻ سان گڏ، مڙني حصيدارن جي داخلي آزادي ۽ خودمختياريءَ کي بحال رکي ٿو. اهو سرشتو مُختلف رياستن کي گڏيل سُڃاڻپ بخشيندي به، کين مرضيءَ مطابق پنهنجي قومي سُڃاڻپ، ثقافتي واڌاري، معاشي خوشحالي ۽ سماجي روايتن کي قائم رکڻ ۾ مددگار ثابت ٿئي ٿو.