اعلان- پڌرنامو

ڪن به ٻن يا گهڻن مُلڪن جي طرفان ڪنهن اهم سفارتي گڏجاڻيءَ کان پوءِ ميڊيا وغيره لاءِ هڪ مختصر بيان يا وچور جاري ڪيو ويندو آهي، جيڪو روايتي قسم جي اصطلاحن مثال طور: ”گڏيل دلچسپيءَ جي معاملن“، ”تفصيلي ۽ کليل ڳالهه ٻولهه“ ۽ ” علائقائي ڀلائيءَ وارن موضوعن“سان ڏٽيل ۽ ڪنهن به قسم جي اصلوڪي معلومات کان وانجهيل هوندو آهي. هي بيان اڪثر ڪري لاڳاپيل مُلڪن جي طرفان ڪنهن اتفاق راءِ تي پهچڻ جي نتيجي ۾ جاري ٿيندو آهي، پر ڏٺو ويو آهي ته سفارتي سطح تي اهڙي قسم جي ”اتفاق لاءِ“ پيدا ڪرڻ لاءِ وڏي مٿاڪُٽ ڪرڻي پوي ٿي. ڇاڪاڻ ته ڌرين سان لاڳاپيل سفارتڪار پنهنجن پنهنجن ملڪن جي مفادن کي نظر ۾ رکندي جاري ٿيندڙ دستاويز جي ٻولي ۽ لهجي کان سواءِ ان ۾ شامل تفصيلن ۽ گرامر توڙي صورتخطيءَ جي معاملن ۾ پڻ سخت احتياط کان ڪم وٺندا آهن. انهيءَ غير معمولي احتياط سبب ڪن موقعن تي مورڳو گڏيل اعلان کان ئي لنوايو ويندو آهي.